KALIBO, Aklan—May bag-o eon nga regional police director ro Western Visayas.
Pormal eon nga ginbayluhan ni Police Brigadier General Flynn Dongbo si Police Brigadier General Rolando Miranda nga nakataeana eon nga maga-retiro sa serbisyo sa Nobyembre 16.
Ro daywa hay magka-klase sa Philippine Military Academy ukon PMA Class 1990.
Suno kay P/Lt. Col. Arnel Solis , tagapaghambae it police regional office ukon PRO 6 nga mismong si PNP chief, Police General Guillermo Elazar, ro nagpanguna sa turnover of command, Miyerkules it agahon sa Camp General Martin Teofilo Delgado sa Fort San Pedro.
Si Dongbo nga tubong La Trinidad, Benguet hay dating hepe it Integrity Monitoring and Enforcement Group.
Gindugang pa ni Solis nga si Dongbo hay bukon eon it bag-o sa Western Visayas bangud nga dati man imaw nga na-assign sa Bacolod City Police Office may pilang dag-on eon ro nagtaliwan.
Nakaserbisyo man sigon raya sa UN peacekeeping mission sa Liberia ag East Timor.
Ginpromisa sigon ni Dongbo nga mas pang pagapabaskugon ro sangka programa ni PNP Chief Eleazar ro intensified cleanliness policy kamana man ro internal cleansing ag ro pagpa-enhance pa sa training ag schooling it mga kapulisan.
Pagapadayunon man sigon kara ro mga naumpisahan nga programa ni Miranda angot sa kampanya kontra sa illegal nga droga, kriminalidad, insurhensiya, ag pagpahaum sa eleksyon sa masunod nga dag-on.
Si Miranda hay nagpungko sa pwesto ko Disyembre 2, 2020 bilang kabaylo ni Police Brigadier Rene Pamuspusan.
