KALIBO, Aklan—Nagaabot eon sa kabilugang 1,794 ro kaso it COVID-19 sa Western Visayas.
Raya hay kasunod sa nailistang 93 nga bag-ong kaso base sa ginpagguwa nga Case Bulletin No. 132 it Department of Health (DOH) region VI.
Sa nasambitang numero, nakalista it 37 nga bag-ong kaso ro Negros Occidental; Iloilo City nga may 32; Iloilo Province nga nakalista it 16 nga kaso; Bacolod City nga may ap-at ag probinsya it Antique nga may daywang bag-ong tinamaan it Covid-19.
Samtang, daywa man ro panibag-ong namatay bangud sa nasambit nga sakit kon sa siin tanan hay maghalin sa Iloilo City nga ginakaeakipan it sangka 78 anyos nga babaye ag sangka 69-anyos nga eaeaki.
Ro Western Visayas hay may active cases nga 918; 24 death toll ag 852 eon ro mga naka-recover matapos ro pagbueong ag quarantine procedure.
May kaangtanan kara, padayon ro pagpadumdom it ahensya sa mga pumueoyo nga magsunod sa ginapatuman nga minimum health standards kparehas it mandatory nga pagsuksok it facemask, pag-obserba sa physical distancing ag perming ipabilin nga malimpyo ro eawas agud nga makalikaw sa makataeapon nga sakit.
