Gindeklara eon it World Health Organization (WHO) ro pagtapos it hantavirus outbreak nga angot sa sangka cruise ship matapos makumpleto it nailistang na-exposed sa sakit ro andang quarantine ag magnegatibo sa virus.
Suno sa WHO, nag-abot sa 13 nga katawo ro natapnan it sakit samtang tatlo nga iba pa ro namatay.
Ro outbreak hay gina-angot sa Andes virus, sangka tumaeagsahon nga klase it hantavirus nga kaeabanan nga makit-an sa Argentina ag Chile.
Nag-umpisa ro insidente matapos maghalin ro cruise ship nga MV Hondius halin sa Argentina ko Abril 1.
Pagkatapos it sang domingo, nakalista eon it mga kaso it impeksyon sa mga pasahero ag crew nga ko ulihi hay na-trace ag ginpaidaeum sa monitoring ag quarantine.
Ginpahayag it WHO nga matapos ro negatibong resulta it ulihing na-exposed sa sakit ag sa pagtapos it quarantine period, owa eon it natumod nga bag-ong kaso it hantavirus, rason nga opisyal eon nga gintapos ro outbreak.
Ro hantavirus hay sangka sakit nga ginapasa sa tawo halin sa mga sapat, partikular ro pinaagi sa exposure sa ihi, higku, ukon eaway it mga infected nga eanggam, ag pwedeng magtuga it grabeng respiratory illness.
