KALIBO, Aklan—Maga-arangkada eon sa Mayo 2 hasta 7 ro makaron nga edition it Western Visayas Regional Athletic Association ukon WVRAA meet nga iga-host it Negros Occidental.
Suno kay Hernani Escullar Jr., tagapaghambae it Department of Education ukon DepEd Region 6 nga ro pag-host it WVRAA makaron nga dag-on hay pagakabuligan it Division of Negros Occidental ag Division of Bacolod City.
Bangud sa mainit nga paniempo tuga it naeksperyensiyahan nga el nino phenomenon, ginpahayag ni Escullar nga ro nagapanguna nga priority it ahensiya sa nasambit nga sports meet hay ro ikamayad nga eawas it mga student-athletes.
Ginkasugtanan sa solidarity meeting nga pagasundon nanda ro health protocols nga ginpatuman ko nagtaliwan nga dag-on kun sa siin owa ginapasugtan ro outdoor games sa katung-anan it alas-10 it agahon hasta alas-3 it hapon.
Tuyo kara nga masiguro ro kaeowasan it mga nagapasakop bangud sa mainit nga tiempo.
Sangka ocular inspection suno kana sa mga playing venues ag billeting centers ro pagapatigayunon antes ro pahampang, apang sa inisyal nga pag-usisa hay nakita nga may nagakaigo man ro mga raya nga bentilasyon ag supply it tubi kamana man owa it nakita nga problema sa mga playing venues.
May nagpahisayod man sigon nga sa maabot nga Abril 27 hay may pilang delegado eon ro maga-agto sa lugar agud nga ma-familiarize ro venue it mga games.
Madumduman nga ro Iloilo ro gindeklarang WVRAA defending overall champion ko 2023 nga ginpatigayon sa Aklan, samtang ro Negros Occidental ro 1st runner-up.
Ginaboeobanta nga maga-abot sa 4,756 ro delegasyon sa 2024 WVRAA meet nga pagaeakipan it mga atleta, coaches, assistant coaches, chaperones, mga tawuhan it regional office ag mga miyembro it technical working group.
Ro billeting area it Aklan hay sa Bacolod city national high school.
Ro resulta it mga hampang ag medal tally hay iga-post sa official facebook page it WVRAA 2024 ag DepEd Tayo Western Visayas.
