POLICE Report — Patay ro daywang estudyante samtang naninahan ro sambilog pa matapos nga mag-overshoot sa karsada ro ginasakyan nanda nga motorsiklo ag bumunggo sa sangka traysikol sa Brgy. Bulanao, Tabuk City, Kalinga.
Halin ro tatlong estudyante it Kalinga National High School sa andang eskwelahan kat bumunggo ro ginasakyan nga motorsiklo sa sangka traysikol sa intersection sa Bulanao National Road sa nasambit nga lugar.
Sa pag-usisa it kapulisan, madasig ro pagpadaeagan it mga estudyante nga naging rason para sumaka ro motor sa center island antes nga bumunggo sa tricycle.
Bangud sa kabaskog it pagkabunggo, nagtagilid ro tricycle nga naging rason agud nga maninahan ro sangka pasahero nga manugturo.
Nag-angkon it grabeng nina sa ueo ro daywa sa mga estudyante nga puro mga owa it suksok nga helmet nga naging rason it insigida nanda nga pagkamatay samtang ro sambilog hay padayun nga ginabueong sa Cagayan Valley Medical Center.
Ginasugid nga masyadong madasig ro pagpadaeagan it motorsiklo nga ginasakyan it mga estudyante rason nga naduea-an it kontrol sa manibela ro driver nga nagresulta sa makangieidlis nga aksidente.
Suno sa pulisya, haeos adlaw-adlaw sanda nga nagapatigayon it monitoring sa mga eskwelahan apang may una gihapon nga pilang mga ginikanan nga matig-a it ueo nga ginapasugtan ag ginakonsinti ro andang mga menor-de-edad nga mga inunga nga magmaneho it motorsiklo nga owa it lisensya ag nagakaigo nga papeles.
Mag-eowas sa kawad-an it papeles hay maabu nga mga estudyante ro nagamaneho nga owa it helmet ag safety gears kun sa siin hay haeos adlaw adlaw nga may nailistang aksidente sa daean.
