MAKATO, Aklan—Parehong naninbahan ro daywang motorcycle rider kat sanda hay magbueungguan sa national highway nga sakop it Brgy. Mantiguib sa banwa it Makato .
Suno kay P/Lt. Arnold Tejada, deputy chief of police it Makato Municipal Police Station nga ro driver it ninja sports bike hay gindaea sa sangka pribadong ospital matapos nga mabalian it anang abaga samtang ro driver it rusi motorcycle 125 nga kulay itom hay nagapamayad man sa provincial hospital bangud sa anang mga gasgas sa nagkaeain-eain nga parte it eawas .
Base sa imbestigasyon, parehong halin sa banwa it Makato ag paagto sa direksyon it Kalibo ro daywang rider kat pag-abot sa gin-eontaran it insidente hay gulping lumiko pawaea ro driver it motorsiklo agud nga magpatayon kunta it gasolina .
Ginasugid nga na-aeang-aeangan ag owa eagi naka-preno ro driver it sports bike rason nga bumunggo sa anang kasunod nga motorsiklo.
Sa kabaskog it impact, inapok ro parehong rider.
Samtang, gindugang pa ni P/Lt. Tejada nga nakataeana nga maga-istorya ro magtimbang nga parte angot sa natabu.
Parehong nakasuksok it standard nga helmet ro daywa ag kompleto ro mga dokumento sa pagmaneho.
Laygay it opisyal sa mga motorista nga pirmeng igapatuman ro defensive driving agud nga makalikaw sa aksidente.
