KALIBO, Aklan—Inde mabakae ro kasadya nga nabatyagan makaron ni Atty. Fritzie Zaspa kaibahan ro anang bilog nga pamilya matapos nga napabahin ro anang pangaean sa 2,103 nga mga nakapasa sa 2019 Bar examination halin sa 7,685 nga aspirants.
Si Atty. Zaspa hay tubong Brgy. Poblacion, Libacao kon sa siin nag-eskwela it elementarya sa Libacao Central Elementary School; nagtuon it sekondarya sa Regional Science High School for Region VI sa banwa it Kalibo; nagtapos it kurso nga nursing sa Centro Escolar University sa Mendiola, Manila ag nagtapos it abogasiya sa Colegio de la Purisima sa Roxas, City.
Suno kay Atty. Zaspa, sa katapusan sigon hay may kabaylo ro anang pagtinguha kon sa siin nagatrabaho sa adlaw bilang medical representative ag naga-eskwela sa gabi-e para matuman ro handom nga maging abogado.
Ko dag-on 2019 eamang imaw nag graduate ag raya ro anang unang kahigayunan man nga nagbueo it examination kon sa siin eubus nga ginpasaeamatan sa Diyos ro mabahoe nga swerte bangud nga first take eamang nana ro examination kamana man imaw ro unang abogado sa pamilya.
Suno kana, uwa imaw nagnu-eo nga gin-give up nana ro trabaho agud nga mag review sa Metro Manila bangud nga sulit tanan ro anang pinangabudlayan.
Sa makaron sigon hay ginapag-isipan pa nana kon siin i-practice ro ana nga profession.
Samtang, eubus man kara nga ginpasaeamatan ro tanan nga nagbulig sa anang pamilya sa pagpangamuyo ag una gid sigon sa anang eoyo ro bilog nga pamilya halin sa pagtuon hasta nga nagbueo imaw it examination.
