KALIBO, Aklan — Ginpapanaugan it penalidad nga community service ro tatlong menor de edad nga ginaeakipan it daywang 13 anyos ag sangka 12 anyos nga nagsapote sa kaparehong menor de edad bandang alas-6:29 it gabi-i ko nagtaliwan nga adlaw sa Pastrana St. Kalibo.
Suno kay Punong Barangay Neil Candelario nga mag-eowas sa nasambit nga penalidad hay ginpabayad pa ro andang mga ginikanan it gingastos sa pagpa-medikal it biktima.
Nasayuran nga ro insidente hay nakita sa CCTV footage rason nga madali nga nakilaea ro mga menor de edad nga eakot sa insidente.
Dugang pa ni Kapitan Candelario nga insigida nanda nga gin aksyunan ro insidente agud nga matapna ro mga minors sa andang bukon it manami nga pagbinatasan nga basta eamang nga nagapanakit sa andang ma-tripan.
Ko nagtaliwan nga adlaw hay gin-umpisahan eon it mga menor de edad ro andang community service pinaagi sa paglimpyo sa Kalibo Pastrana Park, sementeryo ag iba pang pampublikong institusyon.
Ro desisyon hay pareho sigon nga ginkasugtanan it mga ginikanan it mga menor de edad, barangay council ag kapulisan.
