NATIONAL News — Naaresto ro 31 nga indibidwal sa pageabag sa election gun ban, suno sa Philippine National Police (PNP).
Ginpahayag ni PNP spokesperson Police Brigadier General Jean Fajardo sa press briefing nga kaibahan sa mga naaresto hay ro empleyado it Bangsamoro Autonomous Region in Muslim Mindanao (BARMM) ministry, sangka serviceman it Armed Forces of the Philippines (AFP), tatlong security guards, ag 26 nga sibilyan.
Nakumpiska it mga awtoridad ro 80 nga armas, kaibahan ro 60 nga mga maisot nga armas, daywang
Class A light weapons, sangka Class B light weapon, 17 replicas, ag explosives.
Dugang pa nga may 539 rounds it ammunition ro nadakpan.,
Nailista sa Central Luzon ro may pinakamaabung nakumpiskang armas sa 19, ginsundan it Ilocos Region sa 14, ag Western Visayas sa siyam.
Sa idaeum it Comelec Resolution No. 11067, ro gun ban hay igapatuman umpisa sa Enero 12 hasta Hunyo 11, nga nagatuyo nga bawasan ro election-related violence.
Sa pihak nga parte, dismayado ro Commission on Elections (Comelec) sa numero it mga nag-eabag sa election gun ban.
Suno kay Comelec Chairperson George Garcia nga may una eon nga 80 nga pag-eabag nga nailista umpisa ko election period ag implementasyon it gun ban ko Domingo, Enero 12.
Ginpahayag it Comelec – Gun Ban and Security Concerns Committee nga kabilugan nga 1,131 nga indibidwal ro naisyuhan nanda it certificates of exemption sa election gun ban.
Ro aplikasyon para sa exemption hay dapat nga mai-file sa Comelec.
Samtang, pwede sigon nga magapangatubang sa daywang kaso ro mga magadaea it armas nga owa it exemption.
Sa idaeum it laye, ro pagdaea it armas ukon deadly weapons hay ginabawae sa tiempo it election period kun raya hay bukon it awtorisado it Comelec.
