KALIBO, Aklan—Haum nga magpasaka it nagakaigo nga kaso ro pamilya But matapos nga gin-eabu sa ueo ro anang igbata sa Sitio Binaklingan, Brgy. Archangel, Balete, bandang alas-6:30 gabi-i it Domingo, Hulyo 6.
Nakilaea ro biktimang si Pete Anthony But, 34 anyos ag residente it nasambit nga lugar kun sa siin padayun nga ginabueong sa aklan provincial hospital bangud sa naagum nga lastro sa tuo nga parte it anang ueo samtang ro suspek hay si Mars Cebuano, 25 anyos it Sitio Talimanog, Brgy. Morales, Balete nga presenteng nakakulong sa custodial facility it Balete Municipal Police Station.
Suno kay P/Lt. Marife Cipriano it Balete MPS nga natabu ro ginasugid nga pagpang-eabu matapos nga gina-alegar nga nagwala ro suspek ag nagpang-ayat it inaway samtang sa tunga it karsada.
Bangud nga parehong hilong, gin-eaum it biktima nga imaw ro ginapabati-batian it suspek rason nga nag-agto kana bitbit ro saroe.
Insigidang na-pacify ro daywa apang owa gina-ekspektar it andang mga kaibahan nga may sanduko pa nga daea ro suspek ag sa pagtalikod it biktima hay gin-eabu imaw nga tinamaan sa anang ueo.
Nasayuran nga ro biktima ag suspek nga parehong mangunguma hay magkaibahan man nga nag-inuman sa baeay it andang lolo matapos nga magtrabaho sa eanas.
Ginasugid nga masadya pa sanda ko una samtang naga-inuman ag nagsinaot sa tunga it uean, apang ko ulihi hay nakaangkon it diskusyon rason nga ginpa-uli eon ro suspek.
Nagsurender ro suspek sa estasyon it pulisya bandang alas-7:30 it gabi-i, apang owa narekober ro anang sanduko nga gingamit sa krimen nga gina-alegar nga anang ginpilak.
Samtang, ginpahayag ni alyas nanay pining, tiya it suspek nga maskin nga haum nga magpasaka it kaso ro pamilya But kontra sa suspek nga si Cebuano, apang pagahueaton eon lang sigon nanda ro biktima nga makaguwa sa ospital agud nga sanda ro mag-settle sa andang problema.
