KALIBO, Aklan — Nagapangatubang sa kasong robbery with homicide ro ap-at nga mga suspek nga responsabli sa pagbaril-patay sa sangka micro-lending collector sa Sitio Balisong, Brgy. Pampango, Libacao.
Suno kay Police Captain Willian Aguirre, hepe it Libacao Police Station nga nakilaea eon nanda ro ap-at ka mga suspek apang bukon pa sigon it tyempo agud nga i-divulge sa kahanginan ro andang pagkakilan-ean.
Ginkumpirma kara nga ro daywa hay may dating kasong murder ag grave threat sa Kalibo Police Station.
Base suno kana sa pinakaulihing imbestigasyon it pulisya, planado ro natabo nga insidente ko Hulyo 26 bangud nga tantyado nanda ro oras ko pag-agi it biktimang si Jhon Rey Madera, 24, kolektor it ASA Philippines Foundation nga nakabase sa Brgy. Linabuan Sur, Banga ag residente it Brgy. Anabo, Lemery Iloilo.
Ginpahayag dugang nga andang gintimbangan it pagharang ro biktima ag ginpapundo.
Apang uwa sigon imaw nagpundo rason nga anda raya nga ginbaril ag naigo sa waea nga butkon nga nagresulta sa anang hinali nga kamatayon.
Suno pa kay P/Capt. Aguirre, ro mga suspek hay mga tubong Libacaonon ag nahueog sa regular filing ro andang kaso bangud nga uwa ro mga raya gilayon nadakpan sa follow-up operation it pulisya.
