Una sa 6 nga katawo ro nadakpan sa unang adlaw it gun ban para sa 2025 midterm elections.
Suno kay Commission on Elections (Comelec) chairman George Erwin Garcia, nakalista eon ro kapulisan it mga pageapas sa gun ban halin sa 5 lugar eabi eon sa may Buluan sa Maguindanao, Iloilo city, Malasiqui sa Pangasinan, Cainta sa Rizal ag Cabanatuan city sa Nueva Ecija.
Pila pa sa mga sa mga nadakpan hay ro sangka suldado nga nakadestino sa Philippine Army Aviation Regiment nga si Private First Class Jude Lhuel Ordeniza matapos nga uwat maipresentang certificate of exemption nga gin-isyu it Comelec para sa anang 9-mm pistol sakay it anang kotse kat umagi raya sa checkpoint sa Cabanatuan City.
Sa tyempo ngane it eleksyon nga nag-umpisa kahapon, Enero 12 ag magabuhay hasta sa Hunyo 11, ro mga personnel it Philippine National Police (PNP), Armed Forces of the Philippines (AFP) ag iba pang law enforcement agencies nga ginagampanan ro andang official duties ag nakasuksok it andang uniporme eamang ro ginapasugtan magbitbit it baril.
Samtang suspendido man sa nasambit nga period ro anumang gun permit pareho it permit to carry firearms outside of residence ag letter and mission orders.
Ginakabig man nga sangka election offense ro pageapas sa gun ban nga may kaeakip nga parusang pagkakulong it hasta 6 nga dag’on ag diskwalipikason halin sa pagbuyot it posisyon sa gobyerno dugang pa sa parusa para sa ibang krimen nga haubra it violator.
Kun dumueuong ro gun ban violator, raya ay igapadeport matapos maserbe ro anang sentensiya para sa election offenses ag bueag nga kaso it illegal possession of firearms ag iba pang krimen kun may una man.
