KALIBO, AKLAN — Gin-umpisahan eon nga ipatuman ro an-om nga bueang suspension nga ginta-o it Office of the Ombudsman kontra kay Mayor Denny “Bulldog” Refol it Altavas, Aklan bangud sa imoralidad.
Suno kay Department of Interior and Local Government (DILG) provincial director John Ace Azarcon nga ko Martes nanda nabaton ro kopya it suspension order ag insigida raya nga ginpatuman.
Gintaeana si Vice Mayor Jolly Solita bilang kabaylo it ginsuspindeng alkalde nga ginsaksihan it waeong konsehal, SB secretary, mga staff it mayor’s office ag iba pang empleyado it munisipyo.
Nasayuran nga sa ginpaguwa nga mandato ni Ombudsman Conchita Carpio-Morales, ro suspension hay penalidad sa opisyal bangud sa kasong administratibo nga Disgraceful ag Immoral Conduct.
Sa ginpatigayong fact-finding investigation it Ombudsman, si Refol hay may-una nga asawa apang nakipagrelasyon sa gihapon sa iba ag nakaangkon it sangka onga.
Nakabutang sa Certificate of Live Birth nga si Refol ro ama it onga ag ginbun-ag ko 2007.
Bulgaran sigon ro relasyon kara sa andnag banwa bangud kaibahan kara ro mag-ina sa pagguwa sa publiko.
Depensa pa ni Refol nga maabong mga taga-gobyerno ro may kabit.
Ginpunduhan eon sigon kara relasyon kabangdanan nga dapat eon nga ibasura ro kaso.
