KALIBO, Aklan—Uman nga ginkasa it Social Security System ukon SSS-Aklan ro andang kampanyang Run After Contribution Evaders ukon RACE sa kapin sa an-um nga establisyemento sa probinsiya it Aklan.
Suno kay Atty. Bernardo Dofitas Jr., vice president it Visayas West II Division nga tuyo it nasambit nga kampanya nga ipaintindi it mayad ro mga probisyon nga nakabaehag sa RA 11199 ag ipadumdum sa mga tag-ana it mga negosyo ro andang obligasyon nga magbayad it kontribusyon it andang mga empleyado.
Ro mga nasambit nga establisemento hay nataw-an it show cause order ukon notice of violation halin sa nasambit nga ahensiya.
Kaibahan kara ro sangka parmasya, fashion shop, electronic supply, college school ag iba pa.
Raya eon ro ika-an-um nga operasyon nga ginpangunahan it SSS Kalibo branch ag SSS Regional Office .
Sa pagbisita it SSS, gintumod ro mga rason kon ham-an nga owa pa sanda nakasumite it kontribusyon it andang mga empleyado.
Ro mga nasambit nga negosyo hay nataw-an it 15 diyas agud nga ayuson ro andang obligasyon agud nga indi eon maka-abot pa sa korte.
Pwede man sigon nga mag-avail ro mga employer it mga programa it SSS agud nga mas maging maugan ro andang pagbayad it obligasyon.
Ro mga nasambit nga programa hay kapareho it “contribution penalty condonation” ag “delinquency management and restructuring program.”
Handum suno kana it SSS nga mapadayun ro aktibidad kara sa masunod nga mga binuean.
Importante suno kana ro regular nga pagbayad it SSS contributions agud nga ma-avail it andang mga empleyado ro mga benepisyo kapareho it retirement benefits, death benefits, maternity benefits, disability benefits, funeral benefits, sickness benefits ag employment benefits.
