KALIBO, Aklan—Ginpangunahan nanday Aklan Governor Jose Enrique Miraflores ag Vice Governor Reynaldo Quimpo ro selebrasyon it Aklan day nga nagatau it haega sa kasaysayan ag pag-umwad it aklan sa nagtaliwan nga 68 anyos nga kahilwayan it probinsiya.
Nagkaeain-eain nga mga aktibidades ro ginpatigayon it provincial government para sa selebrasyon makaron nga dag-on.
Kada Abril 25 hay ginadeklara ro ‘Aklan Day’ sa gahum it Republic Act No. 1414 nga pirmado ni dating Presidente Ramon Magsaysay ko April 25, 1956.
Nakaangkon kaina nga agahon it thanksgiving mass sa St. John the Baptist Cathedral nga ginsundan it civic and military parade bandang alas-7:30 it agahon.
Sa Godofredo P. Ramos Park, nakaangkon it wreath laying ukon floral offerings ag flag raising ceremony.
Nagpatigayon man it commemorative program sa ABL Sports and Cultural Center.
Kada Abril 25 hay sangka special non-working holiday sa bilog nga probinsiya it Aklan agud nga mataw-an it kahigayunan ro mga akeanon nga mag-selebrar sa mga events.
Si Congressman Godofredo Peralta Ramos, ginakilaea nga Father of Aklan hay nagdihon it House Bill No. 334 nga nagaseparar ro Aklan halin sa probinsiya it Capiz ko January 1954.
Nakapasa raya sa senado nga owa it anuman nga amendment ko April 16, 1956 ag napirmahan bilang laye ko April 25, 1956.
Samtang, ginpahayag ni dating sangguniang panlalawigan member atty. emmanuel sodusta nga base sa kasaysayan , may na-establisar eon nga lugar nga ginatawag nga aklan kun sa siin pag-abot it mga espanyol hay ginpaidaeum nanda ro probinsiya sa capiz.
