KALIBO, Aklan—Gin-umpisahan eon nga tibagon it Boracay Inter-Agency Rehabilitation Management Group (BIARMG) ro mga istraktura nga nag-eabag sa 25-plus-5 coastal easement sa Bolabog Beach sa Barangay Balabag sa isla it Boracay.
Target it task force nga ma-demolish ro waeong pasaway nga establisimento, kun sa siin, ginaeauman nga matapos makaron nga dominggo.
Suno kay BIARMG general manager Natividad Bernardino kaibahan sa andang pagatibagon hay ro mga hotels, restaurants, bars ag kite surfing schools.
Ko Oktubre 2018 pa sigon nagpaguwa it ultimatum ro Local Government Unit (LGU)-Malay sa mga violators ag ro pinaka-ulihi hay ko Marso 25 it makaron nga dag-on.
Dugang pa ni Bernardino nga kinahangean nga boe-on ro mga nasambit nga istraktura agud nga owa it sab-eag sa ginahimo nga drainage system it Department of Public Works and Highways (DPWH).
Nasayuran nga ko nagtaliwan nga dag-on hay ginbutangan it markings ro mga istrakturang kinahangean nga gub-on.
Owa man sigon nagsukoe ro mga negosyante sa demolition team sa pagkabaeaka nga sanda ro pagabalikan bangud sa owa pagsunod sa mandu nga self-demolition.
