KALIBO, Aklan — Uman nga nataw-an it kahigayunan it Police Regional Office (PRO)-6 ro pilang pulis sa Aklan nga makapaidaeaum sa 35 diyas nga Criminal Investigation Course.
Suno kay SPO1 Nida Gregas, public information officer it Aklan Provincial Police Office (APPO) nga nagatuyo nga mas pang mahanas ag mapabaskog ro kasayuran it mga pulis sa tama nga pag-imbestigar.
Sa makaron suno kana hay required sa kada police officer nga magpaidaeaum sa nasambit nga investigation course.
Aminado man si Gregas nga masyadong kueang makaron ro PNP sa mga mayad nga imbestigador rason nga nagaka-dismiss ro ibang mga kaso nga andang ginabuytan bangud sa teknikalidad.
Ginasugid nga raya hay kaparte sa inisyatibo ni PNP regional director Police Chief Supt. Cesar Hawthorne Binag nga masanay it husto ro maabu nga mga pulis sa patag it criminal investigation.
