KALIBO, Aklan — Masobra sa 20 ro naninahan, daywa kara ro una sa kritikal nga kundisyon matapos nga magtagilid ro andang ginasakyang bus sa Barangay Linayasan, Altavas, Aklan.
Padayon nga ginabueong sa Intensive Care Unit (ICU) it sangka pribadong ospital sanday Kyle Jefferson Gervero y Recabe, 3, residente it Sitio Libtong, Brgy. Estancia, Kalibo nga nautod ro tu-o nga siki ag bus driver nga si Bryan John Lasalita Lebero, 37, it Brgy. Camalig, Jaro, Iloilo City.
Pitong iba pang pasahero nga may grabeng lastro ro nagapabilin sa hospital samtang ro iba pa hay naka-uli eon matapos maeapatan it paunang medikasyon.
Suno kay SPO1 Freginel Decio it Altavas Police Station, padueong sa Jamindan, Capiz ro nasambitang bus halin sa banwa it Kalibo kat matabo ro aksidente.
Sangka pasahero sigon ro nagpara agud nga magpanaog, apang sa pag-preno it driver hay nagtagilid ro bus ag nagbaliskad sa pihak nga linya it karsada bangud sa madanlog nga daean tuga it mabaskog nga bu-bo it uean sa pagpanaeasa it bagyong Ramil.
Nag-angkon it nina sa nagakeain-eain nga parte it eawas ro mga pasahero kaeakip ro driver.
Plano sa makaron it pilang mga biktima nga magpasaka it kaso kontra sa nagapanag-iya it bus nga Vallacar Transit Inc.
