KALIBO, Aklan — Naka-deploy eon ro kapin sa 630 nga mga pulis para sa naga hilapit nga pagpasara ag rehabilitasyon sa isla it Boracay sa Abril 26.
Sa interview it Bombo Radyo, gin depensahan ni SPO1 Nida Gregas, tagapaghambae it Aklan Police Provincial Office (APPO) ro reaksyon nga overkill ukon sobra-sobra ro deployment it security forces nga kaeakip sa gin bilog nga Joint Task Force Boracay.
Gin pamilit ni Gregas nga tinotuyo it presensiya it mga pulis ag suldado sa isla nga maipatuman ro masobra nga seguridad agud ma-amligan ro mga pumueoyo.
Gin klaro kara nga pwa man it paeag sa isla apang, gusto eamang sigon nandang malikawan ro kinagamo nga posibling uminit pa engkasong makaangkon it hubeag protesta.
Nasayuran nga pila sa mga nakadeploy nga pulis sa lugar hay nagpaidaeum sa pag ensayo kontra sa mga rally.
Ku mga nagtaliwan nga inadlaw hay pilang simulation exercises ro gin himo it task force agud hasaon sa pagpatuman it “No ID, No Entry” ag “No Swimming” policy kamana man ro mga paga himuon engkasong makaangkon it hubeag protesta, insidente it sunog, pag-atake sa mga vital installations, pagpamomba, hostage taking, pagpamaril ag iba pa.
Suno pa kay Gregas, hugot man nga iga patuman ro ordinansang “One Entry-One Exit” policy.
Hin-aga, Abril 25, sang adlaw bago ro Boracay closure hay magapatigayun pa sigon it review and simulation it security plan nga pagasaksihan it bag-ong pungko nga si PNP chief Oscar Albayalde.
