KALIBO, Aklan—Arestado ro number 2 high value target it Capiz Provincial Police Office (CPPO) ag ap-at nga iba pa sa ginkasang drug buy-bust operation it pulisya sa ulihing adlaw it selebrasyon it Kalibo Sto. Niño Ati-atihan Festival 2019 sa probinsya it Aklan.
Unang naaresto sa Barangay Poblacion ro tatlong drug surenderee nga sanday Michael Adrias; 32, sangka tatoo artist; Jamaica Cill, 19; ag Angelica Aranza, 26; ag parehong mga residente it Roxas City, Capiz.
Narekober sa mga raya ro daywang sachet it suspected shabu kabaylo it P5,000 nga buy bust money.
Samtang, sa pag-imbestiga it pulisya, ginkanta it tatlo si Ryan Aninacion it Roxas City ag ginakabig nga high value target kaibahan si Leonardo Anbino it Taguig City bilang supplier it illegal nga droga nga ko ulihi hay naaresto man it pulisya sa Barangay Bulwang, Numancia, Aklan, sa lugar kon siin sanda temporaryong nagdayon.
Narekober sa mga raya ro daywang sachet it ginadudahang shabu ag marked money nga P3,000.
Ro nasambitang operasyon hay ginpatigayon it Provincial Drug Enforcement Unit (PDEU), Philippine Drugs Enforcement Agency (PDEA)-6, Kalibo ag Numancia Municipal Police Station.
Ro limang mga suspek hay nakakulong eon makaron ag nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002
