KALIBO, Aklan — Nagapadayun ro imbestigasyon it pulisya kasunod it nakitang drum nga may sueod nga used oil ukon “asayte” nga naga-eutaw-eutaw sa baybayon nga sakop it Sitio Tambisaan, Brgy. Manocmanoc sa isla it Boracay.
Suno kay P/Cpl. Ryde Querubin it Malay Police Station nga kat ginhaw-as sa tubi-dagat ro nasambit nga drum kabulig ro pilang residente hay natukiban nga puno raya it langis.
Base sa paunang imbestigasyon, posible sigon nga gin-anud ro drum halin sa tunga it dagat.
Apang owa pa natumod kon ginhungod ukon aksidente nga nahueog raya halin sa mga saeakyang pandagat nga naga-eayag sa nasambit nga baybayon.
Samtang, ginduea it mga otoridad ro pagkabaeaka it mga residente, bakasyunista ag turista bangud nga owa it natabu nga oil spill ukon pagtagas it langis halin sa nasambit nga drum nga posibleng magtuga it perwisyo sa mga nagapaligis sa dagat.
