KALIBO, Aklan — Suportado it lokal nga gobyerno it Malay ro planong pagpatindog it Boracay-Caticlan bridge nga nagabalor it P5.5 bilyon nga ginaduso it sangka mabahoe nga kompanya.
Suno kay Malay Acting Mayor Frolibar Bautista, nagpueong eon sanda kaibahan ro mga department heads ag ro pamunuan it kompanya nga magapatindog it tulay nga magasugpon sa mainland Malay ag isla it Boracay.
Ginpahayag dugang ni Bautista nga kon madayon gid man ro proyekto nga may habang 1.2 kilometer hay magaserbe raya nga all-weather access para mapadali eon ro transportasyon kaparehas it paghakot it basura paadto it mainland Malay, pag-transport it pasyente kon may emerhensiya ag inde eon ma-stranded ro bakasyunista, turista, workers ag residente engkasong maeain ro tyempo.
Mag-eowas sa ginaproponer nga tulay, may nagaduso man nga magbutang it cable car ag under water tunnel para sa dugang nga development sa nagapanguna nga tourist destination sa bilog nga Asia.
Apang, maskin ano eamang suno kana ro madayon sa tatlo hay dapat may proper consultation ag planning kamana man masiguro nga magiging manami ro impact ag epekto bukon eamang it sa isla kundi maging sa tawo ag sa tanan nga resources nga may una sa nasambitang lugar.
Nasayuran nga sa makaron hay mismong ro mga motorbanca ro ginagamit nga transportasyon sa pagtabok sa isla.
