KALIBO, Aklan—Pito ro naninahan matapos nga bumunggo ro sangka SUV sa sangka tricycle pasado alas-12:00 kaina it truadlaw sa crossing it national highway ag diversion road sa banwa it Makato, Aklan.
Suno sa panaysayon it sangka residente nga nagbulig sa mga biktima nga nakibot eon lang sanda matapos nga makabati it mabaskog nga eagabong.
Ginasugid nga ro tricycle nga kargado it 6 nga pasahero nga puro mga estudyante sa kolehiyo hay halin sa Brgy. Calangcang ag paagto kunta sa Brgy. Cajilo sa nasambit nga banwa kat bungguan it SUV nga paagto ro direksyon sa Brgy. Caticlan, Malay, Aklan.
Sa grabe it impact, bumalintong pa ro tricycle it makapilang beses samtang sa sueod it saeakyan ro 6 nga pasahero ag driver.
Insigidang gindaea sa Aklan provincial hospital ro mga biktima kaibahan ro driver nga sa mayad nga swerte hay nag-angkon eamang it minor injuries.
Ap-at sa mga raya ro gin-confine sa ospital nga nakilaea kanday Rex John Besola, 21-anyos nga taga probinsiya it Antique; Jonabel Tubao, 23-anyos it Makato; Analy Garcia, 22-anyos it Brgy. Castillo, Makato ag Charmy Joy Villanueva, 25-anyos it banwa it Ibajay samtang ro daywa hay gin-refer sa out patient department nga nakilaea ro sambilog kay Reuben Rey Traje, 24-anyos it banwa it Makato.
Ro insidente hay padayun pa nga gina-imbestigahan it makato police station.
