KALIBO, Aklan—Naga-abot eon sa 26 ro kumpirmadong kaso it coronavirus disease 2019 (COVID-19) sa probinsiya it Aklan.
Suno kay Dr. Cornelio Cuatchon it Provincial Health Office ukon PHO-Aklan nga sambilog sa pinakabag-ong nagpositibo hay naghalin sa banwa it Numancia sa pagkatawo it sangka 33 anyos nga Locally Stranded Individual (LSI) nga nag abot sa probinsiya halin sa Bulacan ko Hulyo 22, 2020 sakay it sangka roro vessel.
Owa sigon raya it sintomas ag presenteng naka-facility quarantine.
Ginklaru man ni Dr. Cuatchon nga owa it nailistang local transmission it sakit sa Aklan.
Kaabuan sa mga kaso hay naghalin sa mga nag uli nga LSIs ag returning overseas Filipino workers ukon ROFs.
Sangka 62 anyos nga babaye halin sa banwa it Malinao ro nauna eon nga ginkumpirma nga nag positibo man sa sakit kaibahan ro anang 29 anyos nga unga nga eaeaki nga parehong LSIs.
Sa ika-13 diyas it anang quarantine, nagpakita ro 62 anyos nga pasyente it sintomas partikular ro eagnat, ubo ag ginahapo rason nga gin admit sa covid ward it provincial hospital.
Sambilog pang 24 anyos nga malinaonon nga call center agent sa Iloilo City ro nagpositibo man sa COVID-19.
Apang owa raya naka uli sa Aklan umpisa nga ginpatuman ro lockdown ko buean it Marso.
Temporaryo sigon nga gin shutdown ro andang kompaniya bangud sa maabu sa mga empleyado ro nagpositibo sa covid 19.
Sa 26 nga kumpirmadong kaso sa Aklan, sambilog ro namatay.
Ro 48 anyos nga pasyente hay namatay sigon bangud sa stage 4 breast cancer.
Samtang, ginpadumdum man nana sa publiko nga kon owa it importanteng panaw hay likawan anay nga magbiyahe paagto sa Iloilo bangud sa nagatinaas nga kaso idtu.
