KALIBO, Aklan—Kabilugan nga naging matawhay ro pagbisita sa mga sementeryo sa banwa it Kalibo kahapon nga adlaw it Miyerkules, Oktobre 28.
Raya hay matapos nga 30 porsyento eamang it kapasidad kara ro ginapasugtan nga makasueod agud nga malikawan ro posibleng pagkalhit it Coronavirus Disease 2019 ukon COVID-19 pandemic.
Umpisa makarun nga adlaw, Oktobre 29 hasta Nobyembre 4 hay temporaryo anay nga igasarado ro mga pampubliko ag pribadong sementeryo kamana man ro kolumbaryo sa bilog nga nasyon.
Suno sa pilang mga indibidwal nga nagbisita sa panchon it andang mga mahae sa kabuhi, mabahoe ro deperensya it selebrasyon it piyesta minatay makarun nga dag-on kumpara sa mga nagtaliwan nga dinag-on.
Kun dati sigon hay nagadueotdutan ag nagapanggutok ro mga tawo, makarun sigon hay masyadong mahawan ro mga sementeryo bangud sagkiri eamang ro tawong nagabisita.
Kaangot kara, hugut man nga ginapatuman ro “No facemask, No faceshield , No entry policy” kamana man nga ginabawae ro pagdaea it mga mataeum nga bagay, aeak, inflammable materials, ag mga unga sa mga sementeryo.
