KALIBO, Aklan—Nagpaandam si Sangguniang Bayan member Matt Aaron Guzman, chairman it committee on transportation it banwa it Kalibo sa mga motorista nga hugut nga magsunod sa traffic code ordinance bangud nga haeos nag-taas ro ginapapanaog nga multa ag penalidad sa mga violators.
Suno kay SB Guzman nga makataliwan ro kapin sa 15 anyos hay eubusan eon nga naaprubahan ro pag-amyenda sa dating Municipal Ordinance no. 2005-043 ukon Traffic Code it Kalibo.
Nagapanguna sigon nga katuyuan kara hay maprotektahan ro mga pumueuyu ag mabawasan ro numero it mga aksidente sa daeanon.
Gindesisyunan sigon it Technical Working Group nga nagbilog it ordinansa nga pataasan ro multa agud nga madisiplina ro mga motorista.
Gindugang pa kara nga ro pandemya nga daea it coronavirus hay bukon it rason agud nga indi makasunod sa laye sa trapiko.
Pila sa mga ginhalimbawa kara, ro multa sa owa pagsuksok it helmet samtang nagamaneho it motorsiklo, halin sa dating 500 pesos hay magiging 1,500 pesos makaron ag ro driving without license hay 2,500 pesos.
