KALIBO, Aklan—Kapin sa 27 pa ro nabilin nga aktibong kaso it Coronavirus Disease 2019 ukon COVID-19 sa Barangay Poblacion, Kalibo.
Raya hay matapos nga madugangan it pitong bag-ong kaso ko nagtaliwan nga adlaw it Biyernes.
Samtang, nadugangan man it sambilog ro namatay sa nasambitang barangay tuga it deadly virus kung siin ginakaeakipan raya it 80-anyos nga babayeng taga Purok 3, C. Laserna St., Kalibo.
Suno kay Punong Barangay Niel Candelario, nakatutok sanda makaron sa sitwasyon it sangka emplaydo sa isla it Boracay nga residente it andang barangay matapos raya nga mag-uli sa banwa it Kalibo maskin owa pa nagguwa ro resulta it ginpatigayun nga RT-PCR test kana.
Kung siin, makataliwan ro pilang adlaw natukiban nga nagpostibo raya sa makataeapon nga sakit.
Suno kay Candelario, mismong katrabaho it pasyente ro nagtawag kanda para ipasayod nga nagpositibo raya sa virus.
Matapos suno kana nga mabaton ro impormasyon hay insigida imaw nga nagreport sa Municipal Health Office para sa nagakaigo nga aksyon.
Gilayon suno kana nga gindaea sa quarantine facility ro pasyente kamana ro immediate family kara para ma-isolate.
Sa makaron hay nagapadayun pa ro contact tracing ag andang pag-imbestiga kung ham-an ginpasugtan nga makaeusot nga makagguwa it Boracay ro nasambitang pasyente maskin owa pa nagguwa ro resulta it swab test.
