KALIBO, Aklan—Patay eon kat maka-abot sa ospital ro sangka eaeaki matapos nga bumunggo sa puno it niyog ro anang ginasakyan nga tricycle bandang alas-3:30 kaina it aga-aga sa Brgy. Dapdap, Tangalan.
Suno kay P/staff sgt. John Mijares it Tangalan Municipal Police Station nga base sa andang imbestigasyon, nagapa-uli eon kunta ro biktimang si Tomas Talaga, 55-anyos, residente it nasambit nga lugar kat maduea-an it kontrol sa ginamaneho nga tricycle rason nga bumungga sa sangka puno it niyog maeapit sa andang baeay.
Nag-angkon si Talaga it grabeng lastro sa ueo bangud sa impact it anang pagkabangga.
Ginasugid nga nakipag-inuman ro biktima sa anang mga igbata sa gintambungan nga birthday party sa Sitio Tuba, Brgy. Tondog sa nasambit nga banwa antes nga natabu ro aksidente.
Gindaea pa raya it mga rumespondeng tawuhan it MDRRMO Tangalan sa Aklan Provincial Hospital, apang gindeklarang dead on arrival.
Matapos nga bumunggo hay nahuoeg pa sa matsa bangin ro anang tricycle.
