KALIBO, Aklan—Magapangatubang sa kasong pag-eabag sa Presidential Decree 1865 ukon Illegal Trading of Petroleum Products ro sangka 71-anyos nga lolo matapos nga madakpan nga illegal nga nagabaligya it gasolina sa Brgy. Tabayon, Banga.
Pinaagi sa gintingob nga operation it Banga PNP ag Criminal Investigation Detection Group ukon CIDG Aklan, naaresto ro suspek nga ginkilaeang si Laurencio Dagiu ag residente it nasambit nga lugar.
Narekober sa anang posisyon ag kontrol ro daywang 2 litro it gasolina nga nakasueod sa bote it softdrinks kabaylo it P100 pesos nga marked money.
Mag-eowas kara, narekober dugang ro 19 ka-litrong gasolinang de-bote nga nagabalor tanan it kapin sa P950 pesos kamana man iba pang mga bote nga uwa eon it sueod.
Si Dagiu hay insigidang gin-aresto ag gindaea sa Banga Police Station kon sa siin imaw sa makaron temporaryong nakakustudiya para sa nagakaigong disposisyon.
