KALIBO, Aklan–Nagapabilin nga inutil ro department of agriculture sa pagsabat sa kinahangeanon it mga mangunguma sa oras it kalamidad.
Suno kay Kim Sin Tugna it Bagong Alyansang Makabayan ukon Bayan-Aklan ag Panguma-Aklan nga imbes nga makabulig hay nagadum-ok pa sa mga mangunguma ro ginatanyag nga mga bulig it DA pinaagi sa andang Registry System For Basic Sectors Agriculture ukon RSBSA.
Matuod suno kana nga may ginatanyag sanda nga bulig pinansiyal apang raya hay pinaagi sa loan ukon pautang.
Raya man sigon ro rason kon ham-an nga maabu nga mga farmers ro owa nagapa-rehistro kara ag nagapa-insured it andang mga pananum sa Philippine Crop Insurance Corporation ukon PCIC maskin pa nga libre ro pagpalista kara.
Ro kinahangean suno kana it mga pumueuyu kada kalamidad hay insigidang bulig para sa andang pagbangon ag makalikaw sa pagkalugi.
