KALIBO, Aklan—Tatlo eamang ro nadugang sa listahan it mga kumpirmadong kaso it coronavirus disease ukon covid-19 sa bilog nga probinsya it Aklan.
Base sa pinakaulihing datos nga ginpaguwa it Aklan Provincial Epidemiology Surveillance Unit it Provincial Health Office, raya hay maghalin sa banwa it Kalibo, Numancia ag Tangalan.
Bangud kara, nagaabot eon sa 1,243 ro kabilugang kaso nga nailista it ahensya halin kat nag-eopok ro pandemya.
Sa pihak kara, kapin man sa waeo ro mga nagmayad halin sa nasambit nga masakit matapos nga ginpaidaeom sa quarantine ag pagbueong.
Raya hay ginakaeakipan it lima maghalin sa Kalibo; daywa sa New Washington ag sambilog sa Numancia.
Kaangot kara, humampak eon man sa 1,052 ro kabilugang nagmayad halin sa deadly virus.
Sa makaron, kapin pa 156 ro aktibong kaso it covid-19 sa Aklan.
Sa nasambit nga numero, 138 ro una sa facility quarantined; 11 ro naka-admit sa ospital ag pito ro naka-home quarantined.
Samtang, nagapabilin man sa 35 ro numero it namatay matapos nga tamaan it makataeapon nga sakit.
