KALIBO, Aklan—Ninahan ro daywa ka mga kaeaeakin-an matapos nga makapilang beses nga gin-eabo it sangka hilong nga eaeaki sa Brgy. Agcawilan, Lezo.
Nakilaea ro mga biktima nga sanday Randy Israel, 43-anyos ag Mark Anthony Alvarez, 20-anyos samtang ro suspek hay nakilaea kay Marlon Leyson, 37-anyos parehong mga residente it nasambit nga lugar.
Base sa report, samtang naga-inuman sa sueod it payag sanday Israel ag Alvarez hay gulpi eamang nag-abot si Leyson nga una sa idaeom it impluwensya it makahieilong nga ilimnon kun sa siin gin-sipa kara ro purtahan it payag.
Mag-eowas kara hay ginpamakamaeu-an pa nana ro mga biktima ag owa it karason-rason nga ginpang-eabo.
Bangud kara, parehong nag-angkon it lastro sa nagkaeain-eain nga parte it eawas ro mga biktima kun siin gilayon man sanda nga gindaea sa ospital.
Samtang, ro suspek hay presenteng nakakulong sa Lezo Municipal Police Station para sa nagakaigo nga disposisyon.
