KALIBO, Aklan—Ginpaidaeom it lokal nga gobyerno it Ibajay ro portions it Purok 1, 3, ag 5 it Brgy. San Isidro sa Surgical Lockdown.
Raya hay kasunod it nagatinaas nga kaso it tinamaan it coronavirus disease ukon covid-19 sa nasambit nga lugar kamana man agud nga taw-an it daean ro contact tracing nga ginahimo it municipal health office.
Una kara, opisyal nga gin-anunsyo it LGU Ibajay ro ap-at nga mga bag-o nga positibo nga kaso it COVID-19 sa nasambit nga banwa.
Angot kara, nagapadayon ro anda nga contact tracing ag aktibo nga surveillance sa bilog nga banwa.
Ro mga identified high risk close contacts hay naka-home ukon naka-facility quarantine eon sigon ag nakataeana nga igapaidaeom sa reverse transcription-polymerase chain reaction ukon RT-PCR Test.
Sa pihak kara, hugot man ro pagpadumdom it health authorities nga mag-obserba it minimum health standards ag protocols kaparehas it pagsuksok it face mask ag face shield, pirme nga paghugas it alima ag pagmaintain it physical distancing sa indi magnaba sa sang metro kapin sa mga pampubliko nga lugar.
