KALIBO, Aklan–Ginpaidaeum sa pitong adlaw nga surgical lockdown umpisa ko Hunyo 20,2021 ro Sitio Sentro ag pilang porsyon it Sitio Pawa ag Sitio Kaingin sa Brgy. Mantiguib, Makato.
Suno kay Barangay Kapitan Jose Rusia it Brgy. Mantiguib, Makato nga ginrekomenda it lokal nga gobyerno sa Rural Health Unit nga ipaidaeum sa lockdown matapos nga makalista it 15 ka mga kaso it coronavirus disease ukon covid-19.
Nag-umpisa eamang sigon raya sa daywang mga miyembro it pamilya nga nagpadaeum sa swab test agud nga gamiton bilang requirement paadto sa Metro Manila, apang kat naguwa ro resulta hay nagpositibo ro mga raya.
Samtang, sa ginpatigayon nga contact tracing hay 13 nga iba pa sa andang miyembro it pamilya ro nagpositibo man sa deadly virus.
Bangud kara hay ginatantiya nga kapin sa 30 ka mga panimaeay makarun ro apektado it ginapatuman nga lockdown.
