KALIBO, Aklan—Agud nga maipatuman it husto ro pagstrikto sa hueag it mga tawo ag negosyo matapos nga ginpaidaeom sa modified enhanced community quarantine ro bilog nga probinsya it Aklan, ginpakamayad ni Governor Florencio Miraflores nga patag-uran ro operasyon it mga business establishment ag maging ro pampublikong transportasyon hay may gintaeana nga oras kon hasta san-o ro mga raya pwede magbyahe.
Sandig sa Executive Order No. 020 nga ginpaguwa it gobernador, ginpasugtan nga mag-operate ro business establishment umpisa alas-6:00 it agahon hasta it alas-4:00 it hapon mag-eowas eon lang sa public ag private hospital, pharmacies ag drug store, media establishments, ag mga may kaangtanan sa pagta-o it serbisyo medical, funeral ag embalming services ag mga nagata-o it proteksyon ag seguridad kaparehas it security ag investigation services.
Samtang ro tanan nga ahensya it gobyerno hay magata-o ro mga raya it serbisyo sa publiko umpisa alas-8:00 it agahon hasta it alas-4:00 it hapon mag-eowas eon lang sa PNP, PNP-HPG, BFP, AFP, PCG, PDEA, NBI ag BI.
Mag-eowas kara, gin-abisuhan man it gobernador ro biyahe it mga pampublikong saeakyan nga pwede ro mga raya magbyahe halin alas-5:00 it aga-aga hasta it alas-6:00 it hapon mag-eowas eon lang sa mga saeakyan nga ginagamit sa emergency, ag mga bus nga naga-agi sa probinsya paadto sa kaeapit nga probinsya kaparehas it mga roro bus.
Ro nasambit nga mandato hay epektibo insigida kahapon nga adlaw ag ro sin-o man nga maga-eabag kara hay may nagakaigong penalidad nga pagaatubadngon.
