KALIBO, Aklan—Eubos ro pagpasaeamat it pamilya ni Carlo Paalam matapos nga piyerdihon kara ro pambato it Japan nga si Ryomei Tanaka sa hampang nga boxing sa nagapadayun nga Tokyo Olympics 2020 “the greatest show on earth”.
Suno kay Teoryo Paalam, tatay ni Carlo nga umpisa kat unga pa eamang hay hobby eun ni Carlo ro paghampang it boxing.
Dati eamang sigon raya nga nagabaligya it pandesal ag bakal.
Hasta nga may nakilaea sigon raya nga sangka coach it boxing ag ginbuligan imaw nga makapag-training.
Sa makarun hay sigurado eun nga maiuli ni Carlo ro silver medal ag nakataeana man nga magahampang sa final para makuhit ro gold medal.
May kaangtanan kara, nagahingyo man ro anang pamilya it padayun nga pagsuporta para kay Carlo hasta sa ulihing pagsabak kara sa ibabaw it boxing ring.
Madumduman nga naging emosyunal si Carlo sa ibabaw it ring matapos i-anunsiyo ro anang pangaean.
Sa unang round it hampang hay nagpakitang gilas si Paalam ag nagbuhi it pilang ka mga mabaskog nga tu-eop rason nga naka-score it 10 sa limang ka mga judges, samtang ro anang kontra hay puro 9.
Nagpadayun man ro anang kadaeag-an hasta sa second ag third round it hampang.
Si Paalam hay nagdaog pamaagi sa sangka unanimous decision.
Madumduman nga ko nagtaliwan nga quarterfinals, ginpiyerdi ni Paalam ro olympic world champion nga si Shakhobidin Zoirov it Uzbekistan.
