KALIBO, Aklan—Naging maayos ro unang adlaw it pagbukas it klase makaron nga adlaw sa tanan nga mga eskwelahan sa bilog nga probinsya it Aklan.
Raya hay kasunod it pormal eon nga pagbukas it School Year 2021-2022 sa idaeom it blended learning sa pangaywang kahigayunan umpisa nga magtuhaw ro pandemya.
Suno kay Dr. Miguel Mac Aposin, Schools Division Superintendent it DepEd-Aklan nga nagapabilin nga distance learning pinaagi sa mga printed modules ro mode it pagtinueon-an makaron nga dag-on.
Kaeabanan sigon sa mga estudyante hay nagatuon pinaagi sa mga ginatao nga modules it mga manugturo samtang limitado eamang ro nagapatigayun it online classes.
Pila sigon sa andang pagatutukon makaron hay kung paano mapabilin ro interes it mga learners sa pagsabat it module ag kung paano mapabaskog ro pagtinueon-on sa distance learning.
Sa pihak kara, sigidas man ro pagpahaum it taeatapan sa posibilidad nga pagpatigayun it limited face to face classes sa Pilipinas.
Aminado si Dr. Aposin nga mabahoe nga hangkat sa parehong estudyante ag manugturo ro porma it pagtuon makaron bangud owa it personal nga interaction.
Samtang, gin-engganyo man kara ro mga ginikanan nga ipalista eon ro andang unga.
Madumduman nga ginpaeawig pa it DepEd hasta Setyembre 30 ro enrollment period para sa mga pampublikong eskwelahan.
