KALIBO, Aklan—Nagapabilin nga matawhay ro nagtaliwan nga an-om nga adlaw it filing it Certificate of Candidacy ukon COC sa bilog nga probinsya it Aklan.
Suno kay PCol. Ramir Perlito Perlas, Provincial Director it Aklan Police Provincial Office (APPO) nga owa it may namonitor ro mga otoridad nga ano man nga klase it insidente may kahilabtanan sa gintaeana nga petsa it Commission on Elections para sa pagfile it COC it mga magapailihir para sa 2022 national and local elections umpisa ko Oktobre 1 ag magatapos sa Oktobre 8.
Samtang sa pihak nga parte ginpahayag man ni PCol. Perlas nga sa pag-umpisa it filing it COC hay ginapatuman man it Philippine National Police ukon PNP ro gun-ban.
Sandig sa ginpaguwa nga memorandum it Suspension sa Permit to Carry Firearms Outside Residence nga ro mga miyembro eamang it Philippine National Police ag Armed Forces of the Philippines ag iba pang Law Enforcement Agencies ro puwedi nga magdaea it armas sa andang official duties.
Tuyo sigon kara nga masiguro nga euwas ro mga igapatigayon nga aktibidad kontra sa mga fire-armed related incidents.
