KALIBO, Aklan—Nakataeana nga magapatawag it pueong ro Provincial Inter-agency Task Force agud nga istoryahan ro posible nga pagrekomenda nanda sa National IATF nga ipaidaeom Modified General Community Quarantine ukon MGCQ ro probinsya.
Suno kay Ibajay Mayor Jo-en Miraflores nga sa makarun hay amat-amat eun nga ginahaeugaan ro mga sueondanan sa bilog nga probinsya matapos nga padayun nga makalista it manaba nga numero it mga tinamaan it COVID-19.
Dugang pa kara nga sa makarun hay bukas eun man ro mga establisiyemento nga nauna eun nga nagsarado kapareho it mga gym, barber shop ag maabo nga iba pa.
Apang, gin-insister ni Miraflores nga ro andang ginapatuman nga paghaeuga hay amat-amat eamang bangud sa kahadlok nga uman nga magtaas ro kaso it COVID-19.
Samtang sa pihak nga parte, ginpasiguro man ni Miraflores nga maskin medyo masako ro anang schedule bangud sa anang kandidtura bilang gobernador sa probinsiya it Aklan sa nagahieapit nga 2022 national and local elections hay indi maapektuhan ro anang pagdumaea sa banwa it Ibajay.
Suno kana nga nagahimo gid imaw it tikang agud nga mabalanse ro anang oras bilang ama it nasambitan nga banwa samtang amat-amat man kara nga ginapakilaea ro anang kaugalingon sa mga pomoeuyo it bilog nga probinsya.
