KALIBO, Aklan—Nakataeanang makipagpueong ro Land Transportation Office ukon LTO sa mga presidente it nagkaeain-eain nga asosasyon it Public Utility Vehicle ukon PUV sa Aklan agud nga matalakay ro may kaangtanan sa igapatuman nga pamasahe.
Raya hay matapos nga gindugangan eon sa 70% ro seating capacity sa mga PUV kasunod it pagbutang sa probinsiya sa Alert Level 2.
Suno kay Engr. Marlon Velez, head it LTO-Aklan kinahangean nga maistoryahan ag matun-an ro sitwasyun ag posisyon it mga drivers ag mga commuters.
Nasayuran nga naga-demand makaron ro mga commuters nga pamatian man ro andang hirit nga panabaan ro pamasahe matapos nga nagpasugot man sigon sanda kato sa hinyu it mga drivers nga haeos doblehon ro pamasahe kat 50% eamang it seating capacity ro ginapasugtan kanda agud nga malikawan ro pagtaeapnan tuga it covid 19 pandemic.
Gindugang pa ni Engr. Velez nga padayun man ro anang pakikipag-angot sa Land Transportation Franchising and Regulatory Board ukon LTFRB nga imaw ro nagadesisyon sa isyu it tamang pamasahe.
Pila sa transport sector ro naga apela nga indi anay panabaan ro pamasahe bangud nga owa pa sanda nakabawi dugang pa ro sunod-sunod nga oil price increase.
Nagaeaum si Engr. Velez nga makadesisyon sanda kun ano ro rasanableng pamasahe sa jeep ag maskin sa mga bus pagkatapos it pueong sa masunod nga domingo.
Samtang, nataeupangdan man it opisyal nga kaeabanan sa mga saeakyan hay owa pa naka-adjust ro andang plastic barriers sa 70%.
Ginarason it mga drivers nga ginahueat pa nanda ro igapaguwa nga bag-ong executive order ni Governor Florencio Miraflores.
