KALIBO, Aklan—Nagpasa it sangka resolution si Kalibo Sangguniang Bayan member Augusto Tolentino para hinyuon sa pamunuan it sa Land Transportation Franchising and Regulatory Board (LTFRB) nga maeakip ro mga tricycle driver ag operator sa mga Public Utility Driver nga makabaton it fuel subsidy halin sa gobyerno.
Suno kay Tolentino, kaibahan man sa mga Public Utility Driver ro mga nagabiyaheng tricycle bangud nagasakay sanda it mga pasahero.
Suportado man it opisyal ro pagpanikasog it pilang kongresista nga nagpaabot it andang pag-ulikid sa mga tricycle driver para maeakip sa pagataw-an it ayuda.
Madumduman nga nauna eon nga gin-anunsyo it Inter-Agency Development Budget Coordination Committee (DBCC) nga magatao sanda sa LTFRB it P1 billion nga cash grants para sa mga PUV drivers.
Nagaeaum si Tolentino nga iga-konsidera it taeatapan ro andang hinyu bangud mabahoe rayang bulig sa sector it transportasyon eabi eon sa mga tricycle driver nga sambilog sa mga apektado it sunod-sunod nga pagmahae it gasolina ko mga nagtaliwan nga dominggo.
