KALIBO, Aklan—Ginkumpirma it Department of Agriculture (DA)-6 nga nakaangkon it sangkiri nga pagtaas sa presyo it karne it baboy sa mga merkado publiko sa bilog nga Western Visayas.
Suno kay Engr. Remelyn Recoter, Regional Director it DA-6, raya hay bangud sa pagtaas it presyo it live stock.
Halin sa dating P110 hay sumaka eon sa P130 hasta P140 ro kada kilo it buhi nga baboy.
Base sa latest monitoring it ahensya, naga-average eon it P245 ro kada kilo it karne it baboy sa mga baealigyaan.
Sambilog suno kana sa nakaapekto kara hay ro sigidas nga pagpadaea it supply sa Metro Manila ag ginaeauman nga mas pa rayang magabuhos sa nagahilapit nga selebrasyon it Paskwa ag bag-ong dag-on.
Haeos triple sigon ro naging pagtaas sa mga ginpadaea nga supply it baboy sa National Capital Region (NCR) bangud ko 2020 hay naga-abot eamang sa 100,000 heads ro naideliver samtang hasta ko Oktobre it makaron nga dag-on hay nag-abot eon sa 340,000 heads ro naipadaea it Western Visayas.
