KALIBO, Aklan—Umpisa sa Lunes nga adlaw, Nobyembre 29, igabalik eon ro dating pamasahe sa mga pampasaherong saeakyan sa bilog nga probinsiya it Aklan.
Raya ro ginkumpirma ni Edgar Igcazensa, manager it Malinao Lezo Transport Cooperative.
Biyernes it agahon hay nagpatawag it meeting si Land Transportion Office ukon LTO-Aklan head Engr. Marlon Velez sa presidente it nagkaeain-eain nga transport groups agud nga ipaabot ro anang mandu nga ibalik ro dating panueuktan sa pamasahe.
Nasayuran nga kat tumama ro COVID-19 pandemic, nagsaka it 100 hasta 150% ro pamasahe sa mga pampasaherong saeakyan bangud sa sangkiri nga pasahero tuga it mga ginapatuman nga travel restrictions.
Gindugang pa ni Igcasenza nga ginapasugtan eon it LTO ro 100% nga seating capacity it mga pasahero, apang hugut nga ginapaandam ro mag-overload.
Raya hay nagakahueugan suno kana nga bawae nga magpapungko sa tunga ag magkabit sa saeakyan.
Gina-engganyo man ro mga pasahero nga ro sin-o man nga driver nga indi magsunod hay i-report sa LTO ukon sa bombo radyo para sa nagakaigo nga aksyon.
Kadungan kara, ginpasaeamatan man it mga drivers ro mga pasahero sa pag-intindi kanda ko tiempo nga malisod ro andang sitwasyon kun sa siin owa sigon ro mga raya nagreklamo maskin nga haeos nadoble ro andang ginabayaran nga pamasahe.
Samtang, gindugang pa ni Igcasenza nga nagpaandam man ro LTO sa tanan nga mga pampasaherong tricycle nga igapa-summon sa oras nga mag-eabag sa out of route ukon magpang-agaw it pasahero sa bukon it gintaeana nga rota.
