KALIBO, Aklan—Kapareho it kaiping nga nasyong Australia, ro selebrasyon it Paskwa sa New Zealand hay ginapatigayon sa katung-anan it summer season.
Suno kay Bombo International Correspondent Albert Rasco it New Zealand nga kaabuan sa mga pumueuyu idtu hay nagapatigayon it Paskwa sa mga baybayon, naga-camping ukon naga-agto sa andang mga holiday homes.
Gindugang pa kara nga maabu nga mga banwa ro nagapatigayon it Santa parade nga may kaibahan nga mga floats nga naka-decorate nga himo it mga negosyante, simbahan ag iba pang grupo.
Kaeabanan sigon raya nga ginapatigayon kada katung-anan it nobyembre hasta disyembre ag makabig raya nga commercial event nga gina-enjoy it tanan.
Sa mga daeagkuan sigon nga siyudad kapareho it Auckland, Wellington, Christchurch ag Hamilton, makita ro mga mabahoe nga Christmas light shows ag mga Christmas tree.
Kapareho sa pilipinas may mga naga-caroling man, nagabutang it Christmas tree sa kada baeay ag ginabutangan it mga magarbong dekorasyon.
Apang kumpara sa aton nga selebrasyon, ginpahayag ni Rasco nga maskin simple eamang hay masadya.
Sa mga Filipino community sa New Zealand, ro Paskwa maskin nga gindeklarang holiday hay makabig nga ordinaryo eamamg nga adlaw bangud nga kaabuan kanda hay nakatutuk sa trabaho.
Pila man sigon sa mga kompaniya idtu hay nagapanupod it turkey ag ham bilang pamaskwa sa mga empleyado.
Mag-eowas kara, waea-tuo man ro mga “sale” sa mga malls partikular ro mga tsokolate.
Bangud nga open country ro New Zealand, nagkaeain-eain man ro mga relihiyon idtu , apang gina respeto ro selebrasyon it paskwa it mga Kristiyano.
