KALIBO, Aklan—Aprubado eon sa ikatlo ag ulihing pagbasa ro ginpasa nga ordinansa ni Kalibo Sangguniang Bayan member Augusto Tolentino angot sa iligal nga pagbaligya it mga bakuna, pagkopya ukon pagpameke it vaccination card ag resulta it RT-PCR test sa banwa it Kalibo.
Tuyo kara nga malikawan ro pagpamintaha it pilang grupo ukon indibidwal eabi pa ag sigidas ro pag-aeabutan it bakuna sa nasyon.
Ro sin-o man nga madakpan nga mag-eabag kara hay may paga-atubangon nga penalidad ag multa nga indi magnaba sa P2,500.
Nag-apela man raya sa publiko nga maging madahan ag indi basta-basta nga magpati sa mga tawong nagasumbil it bakuna eabi pa kun owa raya nag-agi sa tamang proseso.
Kinahang-ean sigon nga maging vigilante ag alerto ro tanan para indi mabiktima it mga pekeng bakuna.
