KALIBO, Aklan—Ginpahayag ni Pook Barangay Captain ag ABC President Ronald Marte nga antes pa man ro direktiba ni Pangueong Rodrigo Duterte nga striktuhan ro hueag it mga pumueuyu nga bukon it bakunado, nagpaguwa eon imaw it mandu sa mga punong barangay nga bantayan ro mga residente sa andang nasakupan.
Suno kay Marte nga partikular kara nga ginapatutukan ro hugut nga pagsunod sa minimum health standards ag ro padayun nga pag engganyo kanda nga magpabakuna kontra COVID-19.
Kadungan kara, ginsuhestiyon nana sa mga barangay kapitan nga magpatawag it meeting kaibahan ro mga health workers ag mga kagawad agud nga ma-monitor kon pilang porsiyento eon ro habakunahan sa andang barangay.
Agud nga mapadasig ag mapilitan ro mga residente, mas mayad nga sa kada barangay himuon ro vaccination drive ukon mag-house-to-house.
Samtang, magahueat sigon sanda it memorandum circular halin sa DILG agud nga may baeasihan sa implementasyon it direktiba ni pangueong Duterte.
