KALIBO, Aklan—Hugot eun nga ginapatuman ro election gun ban sa bilog nga probinsya it Aklan umpisa kaina it agahon.
Suno kay Mr. Crispin Raymund ‘Dodoy’ Gerardo, tagapaghambae it Commission on Election ukon Comelec-Aklan nga epektibo makarun nga adlaw it dominggo, Enero 9 hay ginabawaean eun ro pagbitbit ukon pagdaea it ano man nga klase it armas nga puweding gamiton sa pagpatay kapareho eamang it baril, siyaw ukon sanduko ag talibong.
Raya hay bilang kaparte sigon it tikang nga ginhimo it Comelec sa pag-umpisa it election period sa bilog nga nasyon.
Ginklaro pa kara nga ro tanan nga klase it baril nga may unang license ag permit to carry hay indi eun dapat ipaguwa it gun owners sa andang panimaeay bilang pagsunod sa gun ban ag malikawan ro pagpangatubang sa nagakaigo nga kaso.
Kung madumduman hay kan-o eamang kat nag-isyu ro Comelec it Resolution 10728 nga nagabawae sa bukon it otorisadong paggamit it mga baril ag bodyguards samtang nagapaeapit ro May 9, 2022 elections.
Ginabawaean man sa nasambitang resolusyon ro pagpadaea, pagbiyahe it mga firearms ukon deadly weapons sa guwa it baeay ukon sa mga negosyo maging sa tanan nga public places umpisa Enero 9 hasta Hunyo 8, 2022.
Ro gun ban hay may unang kabilugan nga 150 calendar days.
Sa idaeum pa gid it nasambitan nga resolusyon, ro PNP, Armed Forces of the Philippines (AFP) ag Philippine Coast Guard (PCG) ag mga miyembro it law enforcement agencies eamang ro exempted sa gun ban.
Apang kinahangean anay nandang magbo-oe it authorization maghalin sa Comelec ag kinahangean man nga magsuksok it agency-prescribed uniform samtang naka-duty sa election period.
