KALIBO, Aklan—Nag apela ro Department of Public Works and Highways ukon DPWH-Aklan sa natungdan nga barangay council nga maghimo it resolution agud nga mataw-an it aksyon ro andang mga nasamad nga flood control project.
Ginhalimbawa ni Engr. Joey Ureta, Chief maintenance it DPWH-Aklan ro pagkasamad it revetment wall it Brgy. Linabuan Sur, Banga.
Pinaagi sigon sa resolusyon eakip ro damage assessment report hay maka-request it mabahoe nga pondo sa national office.
Nagtuhaw suno kana ro insidente ko Oktubre it nagtaliwan nga dag-on bangud sa pagpanaeasa it grabeng baha.
Ro masubo suno kay Engr. Ureta nga owa sanda it quick response fund sa pag-repair it mga nasamad nga flood control project.
Ro gina-release eamang sigon kanda nga pondo kada dag-on hay ro para sa repair it national roads and bridges.
Apang ro masubo suno kana hay limitado eamang ro nasambit nga budget nga naga abot sa masobra sa 4 milyon pesos.
Mag-eowas kara, ginbawasan ro nasambit nga pondo ko 2021 it 50% ag makaron nga 2022 hay 25%.
Gindugang pa ni Engr. Ureta nga haeos 43 meters ro nasamad nga revetment wall ag nagakinahangean it major construction ag bukon it repair eamang kun sa siin masobra sa 50 milyon pesos ro posibleng magastos.
Nasayuran nga mag-eowas sa linabuan sur hay may nasamad man nga flood control project sa barangay Jumarap ag Sigcay sa banwa it Banga kamana man sa barangay Tambak sa banwa it New Washington.
