KALIBO, Aklan—Hugut nga ginpamalibaran it lokal nga gobyerno it Kalibo nga nagpanupod sanda it mga bugas nga mabaho ag may supit ag expired nga mga noodles.
Raya ro ginpahayag ni Executive Assistant to the Mayor Basil Tabernilla matapos ro nagakalhit nga post sa social media kun sa siin gina-akusahan ro LGU-kalibo sa pagpanupod it mga samad nga pagkaon sa sangka pamilya nga naka-home quarantine.
Suno kana nga insigidang nag-aksyon ro LGU ag ginbayluhan ro ginareklamo nga mga items kamana man nga ginabo-oe kunta ro gina-alegar nga samad nga mga goods apang owa raya ginbalik.
Samtang, ginpaathag ni Mabel Arboleda it Municipal Social Welfare and Development Office ukon MSWDO nga ginpaagi nanda sa kada barangay ro distribusyon it food packs bangud nga masobra sa 100 ro nailista nanda nga naka-home quarantine.
Sa anang pag-usisa, owa sigon sa mga food packs ro napamatud-an nga samad ukon expired.
Gindugang man ni John Paul Geneta, team leader it relief operations nga pirme sanda nga nagapatigayon it inventory ag pag-check it mga foods packs sa andang bodega agud nga masiguro nga sa maayos raya nga kundisyon.
