KALIBO, Aklan—Nagahueat pa it go signal ro pamunuan it Kalibo Public Market kon magapatuman it “no vaccine, no entry” policy sa sueod it tindahan.
Suno kay market master Abel Policarpio nga magahueat sanda it igapaguwa nga executive order ni kalibo mayor emerson lachica agud nga mapatuman ro nasambit nga patakaran nga pagabawaean nga makasueod sa tindahan ro mga indibidwal nga bukon it bakunado.
Madumduman nga nagpaguwa it direktiba si Aklan Governor Florencio Miraflores nga ro mga vaccinated individuals eamang ro pwedeng makasueod sa mga taeatapan it gobyerno ag iba pang mga business establishments.
Tuyo it nasambit nga tikang nga matapna ro mas pang pagkalhit it COVID-19.
Nasayuran nga pilang banwa eon kapareho it Altavas, Makato, Libacao ag iba pa ro nagpaguwa it mandu nga “no vaxx, no entry” sa andang natungdan nga tindahan.
Samtang, gindugang pa ni Policarpio nga padayun ro andang hugut nga pagpatuman it minimum health protocols antes nga makasueod sa tindahan sa parehong mga vendors ag nagapanindahan partikular ro pagbo-oe it body temperature, pagsuksok it face mask ag paghugas it alima ukon pag disinfect gamit ro alcohol.
